Cijene nafte na najnižem nivou od januara

Na svjetskim tržištima su cijene nafte pale i prošle sedmice, četvrte zaredom, zaronivši na najniže nivoe u osam mjeseci, jer centralne banke zbog visoke inflacije podižu kamatne stope, što bi moglo izazvati recesiju.

Cijena barela na londonskom tržištu skliznula je prošle sedmice 5,7%, na 86,15 USD, dok je na američkom tržištu barel pojeftinio 7,5%, na 78,75 USD, prenosi SEEbiz.

Pad cijena na najniže nivoe od polovine januara je posljedica usporavanja rasta najvećih svjetskih ekonomija i sve većeg rizika od recesije.

Zbog visoke inflacije, centralne banke podižu kamatne stope, što usporava rast ekonomije, a time slabi potražnju za energentima.

Američka i švajcarska centralna banka podignule su prošle sedmice ključne kamate 0,75 postotnih bodova, a britanska i norveška pola boda.

Trgovci strahuju da će viši troškovi zaduživanja zagušiti ekonomski rast i izazvati recesiju, a njihova strahovanja potpirilo je u petak istraživanje S&P Globala, koje je pokazalo pad PMI indeksa poslovne aktivnosti u eurozoni u septembru, treći mjesec zaredom.

- Recesija u eurozoni vrlo je izgledna - ocijenio je ekonomista S&P Globala Chris Williamson.

Zbog toga su u petak cijene nafte pale oko pet odsto.

- Slabi evropski PMI indeksi, zabrinutost za rast zbog agresivnog zaoštravanja monetarne politike u Sjedinjenim Američkim Državama (SAD) i Evropi pritisak su rizičnoj imovini. Ni cijene nafte nijesu imune na te bojazni u vezi sa rastom - objasnio je Giovanni Staunovo iz švajcarske banke UBS.

Negativno je na cijene nafte uticalo i jačanje dolara. Dolarov indeks, koji pokazuje kretanje vrijednosti američke prema ostalih šest najvažnijih svjetskih valuta, porastao je prošle sedmice tri odsto i dostigao je novi najviši nivo u 20 godina. A to poskupljuje naftu za kupce drugim valutama, pa negativno utiče na potražnju.

- Strah od recesije, učestalo podizanje kamatnih stopa centralnih banaka i snaga dolara nadjačali su geopolitičke napetosti - kazao je Tamas Varga iz PVM Oil Associatesa.

PVM Oil Associates

S&P Global

UBS banka Švajcarska

Chris Williamson

Giovanni Staunovo

Tamas Varga

nafta

cijene nafte

recesija

inflacija